Միացյալ Նահանգների պետքարտուղար Էնթոնի Բլինքենը ելույթ ունենալով Սաուդյան Արաբիայի մայրաքաղաք Էր Ռիադում անցկացվող տնտեսական ֆորումում ասել է, որ վճռական աջակցում են Իսրայելին, որպեսզի այն, ինչ տեղի ունեցավ հոկտեմբերի 7-ին այլևս երբեք չկրկնվի, միաժամանակ լի են վճռականությամբ հնարավորինս անել Գազայի հատվածի խաղաղ բնակիչներին պաշտպանելու, մարդկային տառապանքներին վերջ տալու համար։ Նա նշել է, որ հումանիտար օգնության հասանելիության համար Իսրայելը պետք է ավելին անի։
Բլինքենը հույս է հայտնել, որ «Համաս»-ը կընդունի Գազայի հատվածում հրադադար հաստատելու ու պատանդներին ազատ արձակելու Իսրայելի վերջին «անսովոր առատաձեռն» առաջարկը։
Ակնկալվում է, որ «Համաս»-ի ներկայացուցիչներն այսօր Կահիրեում Եգիպտոսի և Քաթարի միջնորդների հետ քննարկելու են Իսրայելի առաջարկած փուլային տարբերակը։
Պաղեստինյան Գազայի հատվածում պատերազմը ավելի քան կես տարի շարունակվում է։ Անցած հոկտեմբերին «Համաս»-ի գրոհայինները հարձակվեցին իսրայելական բնակավայրերի վրա։ Իսրայելը հաղորդել է 1200 զոհի մասին։ ԱՄՆ-ն և Եվրամիությունը «Համաս»-ը ճանաչել են ահաբեկչական կազմակերպություն։ Իսրայելի բանակի պատասխան ռազմական գործողությունների հետևանքով, ըստ Գազայի հատվածի իշխանությունների, զոհերի թիվն անցել է 34 հազարը։
